આંતલિયામાં યોજાયું જિલ્લાના બાળ વૈજ્ઞાનિક પ્રતિભાનું પ્રદર્શન

      આંતલિયામાં યોજાયું જિલ્લાના બાળ વૈજ્ઞાનિક પ્રતિભાનું પ્રદર્શન

નવસારી, 27 નવેમ્બર 2025

જી.સી.ઈ.આર.ટી. ગાંધીનગરની પ્રેરણાથી તથા જિલ્લા શિક્ષણ અને તાલીમ ભવન – નવસારી, જિલ્લા પ્રાથમિક શિક્ષણાધિકારી કચેરી અને જિલ્લા શિક્ષણાધિકારી કચેરીના માર્ગદર્શન હેઠળ અસ્પી કન્યા વિદ્યાલય, આંતલિયા ખાતે જિલ્લા કક્ષાનું બાળ વૈજ્ઞાનિક પ્રદર્શન 2025–26 ઉત્સાહપૂર્ણ રીતે યોજાયું.

પ્રદર્શનનો મુખ્ય ઉદ્દેશ વિદ્યાર્થીઓમાં વૈજ્ઞાનિક દૃષ્ટિકોણ, નવીનતા પ્રત્યે રસજાગૃતિ અને સર્જનાત્મકતા વિકસાવવા તેમજ પ્રયોગાત્મક અભ્યાસને પ્રોત્સાહિત કરવાનો રહ્યો. નવસારી જિલ્લાના નવસારી, જલાલપોર, ગણદેવી, ચીખલી, ખેરગામ અને વાંસદા તાલુકાના વિદ્યાર્થીઓએ વૈજ્ઞાનિક મોડેલો, પ્રયોગો અને પ્રેઝન્ટેશન્સ દ્વારા પોતાની પ્રતિભા ઉજાગર કરી.

આ પ્રસંગે નવસારી જિલ્લા પ્રાથમિક શિક્ષક સંઘના પ્રમુખ શ્રી અજુવેન્દ્રભાઈ પટેલ તથા ગણદેવી તાલુકા પ્રાથમિક શિક્ષક સંઘના પ્રમુખ શ્રી કલ્પેશકુમાર ટંડેલ સહિતના હોદ્દેદારોએ વિવિધ શાળાઓની કૃતિઓની મુલાકાત લઈને વિદ્યાર્થીઓને હર્ષભેર પ્રોત્સાહિત કર્યા.

નવસારી જિલ્લાના ઉંડાચ વાણિયા ફળિયા, માછીયાવાસણ, ભાટ, અંભેટા, મહુડી, સિસોદરા કન્યા શાળા, છાપરા, બોરી ફળિયા, ઓંઝલ, ઉનાઈ, કેલિયા, મલિયાધરા, મિયાજરી, કૃતિખડક, નવી ભૈરવી સહિતની અનેક શાળાઓએ પ્રદર્શનમાં ઉત્સાહપૂર્વક ભાગ લીધો.

પ્રદર્શનની મુખ્ય વિશેષતાઓમાં પર્યાવરણ સંરક્ષણ, પુનઃનવિકરણીય ઊર્જા, ટેક્નોલોજી, ગણિત, હસ્તકલા આધારિત મોડેલો સહિતના નવીન અને સર્જનાત્મક પ્રોજેક્ટોનો સમાવેશ થયો. વિદ્યાર્થીઓએ શિક્ષકોના માર્ગદર્શન હેઠળ સમસ્યા નિવારણ અને વૈજ્ઞાનિક વિચારધારાના ઉત્તમ ઉદાહરણો રજૂ કર્યા.

આમ, જિલ્લા કક્ષાનું આ વૈજ્ઞાનિક પ્રદર્શન નવસારી જિલ્લાના વિદ્યાર્થીઓ માટે વૈજ્ઞાનિક મગજોના વિકાસનું સશક્ત મંચ સાબિત થયું.